Ekainaren 6an, ostirala, ospatuko da Surf Herrien Sarearen proiektuaren barruan jardunbide egokien transferentziarako hirugarren eta azken topaketa. Hau Ribamontán al Mareko Udalak sustatutako ekintza bat da, eta hiru edizio izan ditu dagoeneko: lehenengoa Valdoviñoko Udalean (Galizia) egin zen, bigarrena Somon, etxean, eta azken hau Getxoko Udalak hartuko du.

Topaketarako aukeratutako lekua Getxo Itsas Hub izango da, Getxoko Kirol Portuan kokatutako ekintzailetza eta berrikuntza gunea. Bertan bilduko dira Surf Herrien Sarea osatzen duten erakundeetako ordezkariak, proiektuaren oraingo eta etorkizuneko garapenean lan egiteko.

Egun horretan, bi hitzaldi nagusiren bidez ikusgai jarriko dira sektorean ekintzailetza sustatzeko espazioen kudeaketa-adibide bat —Getxoko Udalak kudeatzen duen Getxo Itsas Hub bera—, eta itsasoko jarduerak modu eraginkorrean antolatzeko eta kudeatzeko tresna baten adibidea, Bloowatch enpresaren parte-hartzearen bidez.

Hitzaldien ondoren, bi mahai-inguru egingo dira Sareko erakundeen barne-lanerako: bata proiektuaren jarraipenean zentratuta, eta bestea etorkizunari begira lan egiteko. Topaketa eta mahaiak GOODLIFE aholkularitzak gidatuko ditu, Ribamontán al Mareko Udalaren laguntza tekniko gisa.